ياماخذ الدنيا ساعة صـدر ومـزاح وضحـك
علّمني كيف اتخلّص من الضيق واضحك وابتسم
لاصرت ماتلقى صديقٍ .. يحتويـك وينصحـك
في وقت ماتاخذ به مْن الأصدقا .. غير الإسـم
تخيّل انّك في مكاني وانـت كـل ٍ .. يجرحـك
والهمّ كِسْرة خبـز مابينـك وبينـك .. تنقسـم
والناس حولك تذبحك مـن زود ماهـي تذبحـك
ماباقي الاّ يوسمون الطعْن في ظهرك .. وسـم
وان جيت تشكي قالوا: اسكت بس والله يصلحك
الجرح جرحك .. والبلى بلواك .. والأمر انحسم
والصبر .. لو ماكل جنبٍ في منامك .. ريّحـك
البال .. ماهيب راحته من راحة اعضاء الجسـم
ولاّ انت يومك رحت تشكي وش معاك ومربحك؟
من صاحب ٍ بالعجـز وانـواع التخـاذل يتّسـم
يقسم لك .. انّه لو درى في ضيقتك مايفظحـك
والمشكله .. يمشي ويفظح فيك .. ويضيع القسم
تفرض عليه المصلحه لو ما يذمّـك .. يمدحـك
يعني كأنّه لوحةٍ حسْـب المصالـح .. تنرسـم
وتضيع ما تدري من اللي لانخيتـه .. يمنحـك
الوقت صكّاته كثيـر .. وطعْـم صكّاتـه دسـم
والقهر .. لامن جيت تفرح ماتلاقـي مطرحـك
في عالم ٍ من ضيق صدر اهْله .. تدوّر للنسـم
فانْ ضاق صدرك وسّعه ياشيخ .. واقلبها ضحك
معْك الحياه بتبتسم بـس انْـت الاوّل "إبتسـم"
